જાહેર જનતા ધ્યાન આપે...
સોશિયલ મીડિયામાં ફરતું બેટી બચાઓ બેટી પઢાઓ યોજના હેઠળ બે લાખની સહાયનું ફોર્મ બોગસ
વલસાડ જિલ્લામાં છેલ્લા કેટલાક દિવસથી બેટી બચાઓ-બેટી પઢાઓ યોજનાના નામે એક બોગસ અરજીફોર્મ સોશિયલ મીડિયામાં ફરતું થયું છે. જેમાં ‘૮ થી ૨૨ વર્ષની બધી દીકરીઓને ર લાખ સહાય મળશે' એવું લખેલું છે. આ અરજીફોર્મમાં લખ્યું છે, એવી કોઇ જોગવાઇ બેટી બચાવો-બેટી પઢાઓ યોજનામાં નથી. આ ફોર્મ તદ્દન જુઠ્ઠું અને બોગસ છે. ભારત સરકાર કે ગુજરાત સરકારની આવી કોઇ જોગવાઇ ધરાવતી યોજના નથી. ભારત સરકારના મહિલા અને બાળ વિકાસ મંત્રાલય, નવી દિલ્હી દ્વારા અનુદાનિત બેટી બચાઓ બેટી પઢાઓ યોજના હાલ ગુજરાતના ૨૨ જિલ્લાઓમાં કાર્યરત છે અને આ યોજનાની જોગવાઇઓમાં દીકરી જન્મે, ભણે, આગળ વધે તે માટે વિવિધ પ્રવૃત્તિઓ દ્વારા પ્રચાર-પ્રસાર કરવાની જોગવાઇઓ છે. આ સિવાય રોકડ કે ચેક સ્વરૂપે કોઇ પણ દીકરીને સહાય આપવાની યોજના નથી. આથી વલસાડ જિલ્લાના તમામ લોકોને વિનંતી કરવામાં આવે છે કે, આ અરજી ફોર્મ ભરે નહીં અને ભારત સરકાર, મહિલા અને બાળ વિકાસ મંત્રાલય, શાષાીભવન, નવીદિલ્હી-૧૧૦૦૦૧, પ્રધાનમંત્રી, આ સરનામે આ જઠું ફોર્મ ભરીને પોતાના આધારકાર્ડ કે અન્ય કાગળો મોકલે નહીં.
આ ફોર્મમાં બેન્કનું નામ, ખાતાનંબર, આધારનંબર, સહી વગેરે જેવી વ્યક્તિગત અને ગુપ્ત માહિતી માંગેલી છે, જે આવા જુઠ્ઠા ફોર્મ ભરવાથી આ માહિતીનો દૂર ઉપયોગ થઇ શકે છે, જેની જાહેર જનતાને નોંધ લેવા જિલ્લા મહિલા અને બાળ અધિકારી, વલસાડ તથા નોડલ ઓફિસર બેટી બચાઓ બેટી પઢાઓ યોજના દ્વારા જણાવાયું છે.
મહિલા રોકડ પુરસ્કાર ૨૦૧૯-૨૦ની અરજી મોકલવા અંગે
સ્પોર્ટસ ઓથોરીટી ઓફ ગુજરાત, ગાંધીનગર દ્વારા વર્ષ ૨૦૧૯-૨૦ના વર્ષમાં વિવધ રમતોની રાજયકક્ષાની શાળાકીય/ખેલ મહાકુંભ સ્પર્ધાઓ અં-૧૪, અં-૧૭ અને રાજયકક્ષાની શાળાકીય અં-૧૯ ર્સ્પધાઓ માટે તેમજ સ્કુલ ગેઇમ્સ ફેડરેશન ઓફ ઇન્ડિયા દ્વારા આયોજિત રાષ્ટ્રકક્ષાની સ્પર્ધામાં એસ.એ.જી દ્વારા રાજયનું પ્રતિનિધિત્વ કરેલું હોય તેવા (ભાગ લીધેલ) મહિલા ખેલાડીઓને કોઇ પણ એક જ રમતમાં તેમજ એક જ સિધ્ધિ માટે મહિલા ‘મહિલા રોકડ પુરસ્કાર' યોજના માટેનું ફોર્મ ભરીને તા.૧૦/૦૨/૨૦૨૦ સુધી જિલ્લા રમતગમત અધિકારીની કચેરીને મળી જાય તે રીતે અરજી મોકલવાની રહેશે. વર્ષ-૨૦૧૭-૧૮, ૨૦૧૮-૨૦૧૯માં મહિલા રોકડ પુરસ્કાર યોજનાથી વંચિત રહી ગયેલ ખેલાડીઓ પણ અરજી કરી શકશે.
તા.૧૬ થી ૨૩ જાન્યુઆરી દરમિયાન કલા મહાકુંભ-૨૦૧૯-૨૦ની સ્પર્ધાઓ યોજાશે
==
યુવક સેવા અને સાંસ્કૃતિક પ્રવૃતિઓ ગાંધીનગર દ્વારા પ્રેરિત જીલ્લા રમત ગમત કચેરી દ્વારા આયોજિત કલા મહાકુંભ-૨૦૧૯ની સ્પર્ધાઓ તાલુકા અને જિલ્લા કક્ષાએ યોજવામાં આવનાર છે. ઉમરગામ તાલુકા કક્ષાનો કલા મહાકુંભ તા.૧૬/૦૧/૨૦૨૦ ના રોજ ટાટા વાડિયા હાઇસ્કુલ નારગોલ, પારડી તાલુકા કક્ષાએ કલા મહાકુંભ તા.૧૭/૦૧/૨૦૨૦ ના રોજ ડી.સી.ઓ. સાર્વજનિક હાઇસ્કુલ પારડી, ધરમપુર તાલુકા કક્ષાનો કલા મહાકુંભ તા.૧૭/૦૧/૨૦૨૦ ના રોજ શ્રી રામેશ્વર માધ્યમિક શાળા બારોલિયા, ધરમપુર, કપરાડા તાલુકા કક્ષાનો કલા મહાકુંભ તા.૧૭/૦૧/૨૦૨૦ ના રોજ શાહ જી.એમ.ડી. સાર્વજનિક હાઇસ્કુલ, કપરાડા, વલસાડ તાલુકા કક્ષાનો કલા મહાકુંભ તા.૧૮/૦૧/૨૦૨૦ ના રોજ બાઇ આવાંબાઇ હાઇસ્કુલ વલસાડ તથા વાપી તાલુકા કક્ષાનો કલા મહાકુંભ તા.૧૯/૦૧/૨૦૨૦ ના રોજ ઉપાસના ઇંગ્લીશ મી.સ્કુલ સ્કુલ, વાપી ખાતે યોજાશે. જયારે જિલ્લા કક્ષાના કલા મહાકુંભ તા.૨૨/૦૧/૨૦૨૦ અને તા.૨૩/૦૧/૨૦૨૦ શાહ એન.એચ કોર્મસ કોલેજ, તીથલ રોડ, વલસાડ ખાતે યોજાશે એમ જિલ્લા યુવા વિકાસ અધિકારી, વલસાડ દ્વારા જણાવાયું છે.
વિદેશમાં ફળ અને શાકભાજી નિકાસ કરવા ઇચ્છતા ખેડૂતો ધ્યાન આપે
જિલ્લાના બાગાયતી ખેતી કરતા ખેડૂતો ચાલુ સીઝનમાં બાગાયતી પેદાશો ફળ અને શાકભાજીની વિદેશમાં નિકાસ/એકસપોર્ટ કરવા ઇચ્છતા હોઇ તેઓ APEDA વેબસાઇટ પર ઓનલાઇન રજિસ્ટ્રેશન કરી શકશે.
ગુજરાતમાંથી યુરોપ, અમેરિકા તથા અન્ય દેશોમાં કેરી અને શાકભાજીની નિકાસ કરતા પહેલાં જે ખેતરમાંથી નિકાસ કરવાની હોય તે ખેતરની એગ્રિકલ્ચર એન્ડ પ્રોસેસ ફુડ પ્રોડક્ટસ ડેવલપમેન્ટ ઓથોરીટી ઓફ ઇન્ડિયાની વેબસાઇટ ઉપર નોંધણી કરાવવી જરૂરી છે. રજિસ્ટેશન થયેલા ખેતરોમાંથી નિકાસકારો ખેતપેદાશોની નિકાસ કરી શકશે. આ નોંધણી માટે ખેડુતોએ નાયબ બાગાયત નિયામકની કચેરી, સેવાસદન-૧, પહેલા માળે, વલસાડ ખાતે નિયત નમુનામાં ૧૦/૦૨/૨૦૨૦ સુધી કરવાની રહેશે.
ઓનલાઇન રજીસ્ટ્રેશન ફોર્મ APEDAની વેબ સાઇટ પરથી ડાઉનલોડ કરવું અથવા નાયબ બાગાયત નિયામકની કચેરી, વલસાડમાંથી મેળવી લેવું. ૭/૧૨ અને ૮-અ જમીનનો દાખલો, આધાર કાર્ડની નકલ, ખેતરનો કાચો નકશો. ફાર્મ ડાયરી વગેરે જરૂરી ડોકયુમેન્ટ સાથે ઓનલાઇન રજીસ્ટ્રેશન કરેલા ફોર્મને કચેરીમાં ૧૦/૦૨/૨૦૨૦ સુધી જમા કરાવવાનું રહેશે.
વલસાડ કલેક્ટરની અધ્યક્ષતામાં સંજાણ ખાતે બાળ સુરક્ષા જનજાગૃતિ વર્કશોપ યોજાયો
વલસાડ જિલ્લાના ઉમરગામ તાલુકાના સંજાણ ખાતે જિલ્લા બાળ સુરક્ષા એકમ દ્વારા જિલ્લા કલેક્ટર સી.આર.ખરસાણના અધ્યક્ષસ્થાને બાળ સુરક્ષા અંગે જનજાગૃતિ વર્કશોપ યોજાયો હતો.
આ અવસરે વલસાડ કલેક્ટર સી.ખરસાણે બાળ સુરક્ષાના કાયદાઓની લોકોને જાણ થાય તેમજ બાળકો ઉપર થતા અત્યાચારોને રોકી શકાય તે માટેની જાણકારી જન-જન સુધી પહોંચાડવા સૌને મદદરૂપ બનવા અનુરોધ કર્યો હતો.
આ વર્કશોપમાં સંકલિત બાળ સુરક્ષા યોજનાઓ, બાળલગ્ન પ્રતિબંધક ધારો, જુવેનાઇલ જસ્ટીસ એક્ટ-૨૦૧૫, પોકસો-૨૦૧૨ અને બાળકોની માનસિકતા અને મૂંઝવણને સમજવા અંગેની વિસ્તૃત જાણકારી આપવામાં આવી હતી.
આ વર્કશોપમાં બાળ સુરક્ષા અધિકારી જાસ્મિન પાંચાલ, ઉમરગામ તાલુકા વિકાસ અધિકારીર રમેશ પટેલ, મામલતદાર આર.આર.નાઘેરા, બાળ સુરક્ષા એકમના કર્મીઓ સહિત તાલુકાની આશાવર્કરો તેમજ નર્સ બહેનો મોટી સંખ્યામાં ઉપસ્થિત રહ્યા હતા.
